Cuisine:Suid Afrikaans

Kategorie:Hoofgereg - Vleis

Kook Tyd:± 1½ ure

Lewer:6-8 porsies

Waterblommetjies kom in die Boland voor en word in September en Oktober gepluk. Waterblommetjies het ´n delikate, eiesoortige geur en daarom word daar nie sterk geurmiddels bygevoeg nie. Bredie is maar net groente, in die resep, waterblommetjies, wat met skaapvleis en geurmiddels lank en stadig gekook word sodat die eindproduk nóg vleis nóg groente is, maar ´n ineengestrengelde stuk heerlikheid. Kortweg ´n nuwe smaak, ´n nuwe smaakervaring.

• 300 g vars waterblommetjies¹
• 1.5 kg skaaprugstring of dikrib, in stukkies gesny
• 250 ml water
• 10 ml sout
• 5 ml peper
• 2 uie, gekap
• 2 knoffelhuisies, gekap
• 2 heel naeltjies
• 5 ml neutmuskaat
• 250 ml droë witwyn
• 1 bossie suring²
• 6 baba aartappels, geskil en halveer

Week die waterblommetjies oornag in soutwater en sny die stingels af. Sprinkel die sout en peper oor die skaapvleis en braai die vleis tot bruin. Verwyder die vleis uit die pan, braai die uie en knoffel tot deurskynend. Skep die vleis terug in die pan en voeg die res van die bestanddele by. Laat dit stowe vir ongeveer 1½ uur todat die vleis sag is. Moet dit nie onnodig roer nie.

As ingemaakte waterblommetjies gebruik word, moet dit eers na so 45 minute bygevoeg word sodat dit nie wegkook nie. Dit is ook lekker om ´n bietjie room net voor bediening by te voeg. Dien dit saam met gekookte rys op.

1. As vars waterblommetjies nie beskikbaar is nie gebruik 1 blik (410 g) ingemaakte waterblommetjies.
2. Indien suring onbekombaar is, kan ´n groen tamatie of suurlemoen sap of ´n suur appel gebruik word.